بقلم:غزة مجيد
واش كاين شي تفسير لهد العبث؟
مدينة كاملة واقفة على رجليها، قاعة عامرة، جمهور، أبطال، تنظيم محكم… وخريبكة كتبان فواحد الصورة زوينة اللي تستاهلها. ولكن فوسط هاد المشهد، كيبان الفراغ الكبير: المجلس الجماعي غايب… والرئيس ما بانش!
آش واقع؟
بطولة المغرب للفرق فالجيدو، حدث وطني ماشي ساهل. فرق جاية من جهات مختلفة، أبطال كبار، حضور رسمي، الحضور ما كانش عادي… كان ثقيّل وكيحشم اللي غاب:
السلطة المحلية هناء برواك حاضرة، الحاج قرواش حاضر، خالد البوصيري حاضر، جمال نعام حاضر، والبطل عادل بلكايد حاضر… وزيد عليهم أطر ومدربين وحكام وفرق جاية من كل الجهات.
هاد الناس كاملين حضرو… واللي خاصو يكون فالمقدمة ما بانش.
واش الدعوة ما وصلاتش وصلات اسي غزة ؟
ولا وصلات وتدار ليها فيو وتم تجاهلها حتى هدي ممكن؟
ولا الرياضة ما داخلاش فحسابات المجلس أصلا امكن؟
ولا يمكن حيث المجلس ما دعمش ماديا، وفضل ما يحضرش… بحال داك اللي كيتعزض لعرس وما جابش الزرورة، وكيبقى حشمان حتى يجي ؟
كيفاش مدينة كتحتاضن بطولة وطنية، والمجلس اللي مفروض يمثلها ما حاضرش؟
هاد الشي ماشي غير غياب… هاد الشي استهتار مفضوح.
مجلس كيصرف الملايين فالتسيير، ولكن ملي كتجي لحظة تمثيل المدينة، كيولي مشغول، ما فراسوش، ولا عندو التزامات.
التزامات مع شكون؟ ومع شنو؟
واش أهم من مدينة كاملة كتتشهر قدام المغرب؟
المشكل ماشي غير فالرئيس، المشكل فمجلس كامل ولا عاجز حتى يدير واجبو الرمزي.
حتى الحضور الشكلي ما قدرش يوفره!
هادشي كيطرح سؤال أخطر:
إذا كانو ما قادرينش يحضرو لبطولة وطنية، فاش قادرين إذن؟
هاد الشي ماشي غير تقصير، هاد تحقير مبطن لمجهودات ناس خدامين بصدق.
كيفاش جمعية كتشرف خريبكة وطنيا، وانت كتقلل من شأنها بصمتك؟
كيفاش شباب كيرفعو العلم الرياضي للمدينة والعلم الوطني ، وانت ما كتعطيهم حتى قيمة رمزية؟
المجلس اليوم تعرى:
لا حضور، لا دعم، لا مواكبة… غير الغياب والتجاهل.
والمفارقة القاسية: اللي ما عندوش الإمكانيات نجح، واللي عندو السلطة… فشل حتى يكون حاضر.
واللي كيزيد يقهر، هو الصمت.
لا بلاغ، لا توضيح، لا حتى اعتذار للناس اللي سهرو على التنظيم.
وكأن المدينة ما كتسواش حتى كلمة.
خريبكة اليوم عطات درس فالتنظيم والروح الرياضية…
والمجلس عطا درس آخر:
كيفاش تغيب وتخلي بلاصتك فارغة، وتخلي الناس يسولو: شكون فعلاً كيسير هاد المدينة؟
السؤال باقي معلق:
علاش ما حضرش رئيس جماعة خريبكة؟
وحتى يجاوب، راه الكرسي اللي خلا فارغ… فضحو أكثر من أي خطاب.
