بقلم:غزة مجيد
مامشا حتى خلاها ودق فيها الوتاد
خلا عصابة نهابة تابعة طريقو فالواد
جاو وجوه الخير نصحوني وقالو: دير يدك فـيد رايس العصابة الشداد
تصاحب مع الريس ومن المال العام تستافد
تعمر الجيب وتركب على الحديد بالجاحد
يعطيك ملعب القرب، تدخل لفلوس عظم فاش تكدد
يعطيك صفقة وتحايد الحزقة يا راكد
تريح مع الأعيان وعليهم تبان مالك جامد
شوف قواد التراك كان هابط ولا صاعد
غير مشية البطة تلف تلف ولا يتبندد
بدل الأسلوب وطعرج بالمقلوب راك تاخد
دير يدك فـ يديه وتولي عزيز عليه، تولي مول دار ماشي وافد
يعطيك بونات ديال المازوط تعيش شاخد
تبع الريس أخويا وكون قواد
تجمع المال بالهبال بلا عداد
قول نعم فكلشي ولو كان فيه فساد
وضحك فوجه الكبير السحارة وخلي الحق يتباد
شوف بوخنونة كان ناشف، قطع الواد
شوف المنتوي كان سخار طلع كراد
شوف الكارم كي لعواد ترقع وجواد
شوف هداك او هديك بالتلحميس تحايد الكساد
شوف بياع الجيفة والمصران والفاد
كان معفن ولى حاكم فالقبة مع السياد
شوف القمار النفاح السي الحاج الخلواض
كان عريوة دار كسيوة من الحرام دار لولاد
شوف اللي كان البارح ساكت اليوم ولى من الأسياد
غير قرب للريس شوية تبدلات فيه الأبعاد
كان كيحسب الدرهم حبة ولى كيغرف بلا عداد
واللي كان يقول الحق ولى مسكين حسّاد
كون بهيمة وسمع غير للي يتعاد
ضرب الطبل للباطل وخلي الحق يتباد
قول العام زين ولو المدينة فيها فساد
وصفق للي نهبها وسميه سيد الأسياد
شوف الوجوه كيف تبدلات بين العناد
والكلمة اللي كانت نار ولات تابعة للإمداد
كيبيعو الضحكة للناس وداخلهم عامر أحقاد
ويقولوا خدمة الصالح وهي غير ستار للإفساد
ياك أيام اللي حكمها غبار وقمار وشحاد
دير راسك ما فاهم وبيع الصوت بالإيجاد
وكل نهار بدل لونك بحال الحرباء فالحياد
إلى عطاك غير الفتات قول هادي هي الأمجاد
وإلى حرمك من حقك قول قدر ومكتوب وزاد
شوف اللي كان كيشكي الفقر ولى يتكلم فالأرصاد
يدير فيها خبير كبير وهو غارق فالفساد
وشوف اللي كان ضدهم بارح اليوم ولى من الأوغاد
غير تبدلات الكراسي تبدل حتى الاجتهاد
لا والله ما نعيش بهاد الاعتماد
لا نكون تابع ذليل ولا نركع للاستبداد
نعيش حر ولو قليل خير من ذل وامتداد
واللي باع راسو بالرخيص عمره ما يلقى المراد
