خريبكة كتغلي.. الوقفات جاية وارئيس الجماعة شكون شرّع هاد القرار؟

بقلم:غزة مجيد
آش واقع فخريبكة؟
قطاع حساس ولى كيغلي، والنقابة خرجات بتصريحات تقيلة كتقول فيها: كاين إقصاء، كاين حيف، وكاين فلوس كتتفرض بلا قانون.

القصة بدات بمراسلات رسمية مشات لرئيس الجماعة:
طلب لقاء، تذكير، انتظار…
والنتيجة؟ والو.
صمت مقلق، وأسئلة كتكثر: شكون كيسير هاد الملف؟ وعلاش الهروب من الحوار؟
الصدمة الكبيرة جاية من هنا:
4000 درهم خاصك تخلص باش تدخل للسبيطار!
النقابة كتقول هادشي خارج القانون، وكيضرب تكافؤ الفرص، وكيخنق المهنيين لي خدامين فإطار قانوني.

وزيد عليها، الاتهام لي هز الرأي العام:
تفويت القطاع لشركة وحدة،
تفويت “على القياس”، بلا احترام لا مساطر لا دفتر تحملات لا دراسات…
يعني اللعبة مفهومة:
اللي عندو النفوذ يدخل، واللي خدم سنين يتقصى.
النقابة رجعات حتى لمذكرة وزارة الداخلية ديال 2008،
لي كتلزم الجماعات بالدراسات والشفافية قبل أي تفويت…
ولكن فخريبكة؟
القانون تحيد، والمشروع تفصل كيف بغاو.
النتيجة:
قطاع ديال الصحة وكرامة المواطنين، ولى سوق ديال المصالح.
والأجواء دابا شاعلة فخريبكة، حيث النقابة أعلنتها صراحة: الوقفات الاحتجاجية غادي تبدا من غدا، والتصعيد داخل بقوة حتى يتصحح المسار ويرجع الحق لأصحابو.

النقابة ما بقاتش ساكتة، وكتلوح بالتصعيد:
احتجاجات، إضرابات، واعتصامات حتى يرجع الحق،
وملفات “أخطر” ممكن تخرج للعلن فأي لحظة.
الرسالة الأخيرة كانت واضحة:
هاد القطاع ماشي غنيمة، وماشي مجال للريع.
ودابا الكرة فملعب المسؤولين…
رئيس الجماعة، واش غيبقى ساكت؟ ولا غادي يجاوب على 4000 درهم وشبهة التفويت؟