قلم: غزة مجيد
المكتب الشريف للفوسفاط دار الغابة المنجمية — مشروع واضح: تشجير، مسارات، تنظيم، يعني باختصار كاين اللي فهم باللي البيئة ماشي زينة راه ضرورة. وفي الجهة الأخرى الجماعة خدامة بمنطق آخر: الأرض كتتحول لقطع والغابة كتولي ذكرى.
غابة العرعار مشات وغابة الكاليبتوس تبخرت. واش الزمن هو اللي داهم؟ لا، اللي داهم هو القرار واللي وقع هو القلع الممنهج. ويجيك الجواب الجاهز: العمران فرض نفسه، لا… ما فرض حتى حاجة السي الرايس، العمران كيتخدم بتوقيع وكيتداز بقرار وكيتبارك بمصالح معروفة.
يعني اللي وقع واضح: شي حد قرر وشي حد سكت وشي حد استفد. وها المفارقة اللي كتحرق الدم: مؤسسة صناعية متهمة تاريخياً بالتلوث ولات اليوم كتصلح وكتغرس، وجماعة مفروض فيها تحمي المجال ولات كتفرط فيه. هادشي ماشي غير خلل، هادي قلة ترتيب الأولويات وقلة المسؤولية.
خريبكة اللي كانت عندها غطاء غابوي ولات كتقلب على مشاريع تعويضية، يعني بدل نحافظو على الموجود ولينا كنصلحو الخراب. الغابة المنجمية مبادرة زوينة ولكن ماشي صك غفران، ما يمكنش نغرسو اليوم ونسكتو على شكون قلع البارح. السؤال الحقيقي ماشي شنو درنا اليوم،
السؤال هو شكون خرب البارح وعلاش ما تحاسبش. حيت بلا محاسبة غادي نبقاو غير كنغرسو فواجهة الصورة وكنقلعو فظهر الحقيقة. خريبكة ما محتاجاش غير مشاريع، محتاجة الوضوح والمحاسبة ووقف النزيف. حيت البيئة ماشي صدقة… البيئة حق، واللي يضيع الحق خاصو يتحاسب.
