زنقة36_غزة مجيد
داروها صحاب وادي زم والصردي، ومشا بنسعيد جاوب معاهوم. وزير الثقافة والشباب والتواصل، المهدي بنسعيد، دار واحد اللقاء مهم مع محمد سقراط، مؤسس ومدير مهرجان وادي زم للثقافة والفنون، ومرافقيه، ومع نور الدين شليح رئيس جمعية المعرض الوطني للسلالة الأصيلة، وأحمد بونافع لي كيمثل المعرض الوطني للصردي فسطات.
اللقاء كان نهار الثلاثاء 10 يونيو 2025، فمقر الوزارة فالرباط، وجا فالوقت لي الجمعيات كتحضّر لدورات جديدة:
الدورة الرابعة لمهرجان وادي زم (من 21 حتى لـ27 يوليوز بمناسبة عيد العرش)
والدورة الثالثة لمعرض الصردي فسطات.
سقراط شد الكلمة، وشرح للوزير كيفاش المهرجان ولات عندو بلاصتو فالساحة الوطنية، وتكلم على الشراكات لي داروها الجمعية مع مؤسسات من البلاد وحتى من الخارج.
الهدف؟ وادي زم تولي عاصمة الثقافة والفن، وترجع التبوريدة والموروث الشعبي ديالها فالعز.
زاد وقال: راه الدعم ديال الوزارة خدم بزاف، وعطى دفعة كبيرة للشباب المبدعين، وخلا الثقافة تولي جزء من التنمية، وحتى من السياحة.
وقال حتى باللي: المهرجان ماشي غير زهو، راه كيخدم الاقتصاد، وكيحرك المدينة، وكيجيب الزوار.
سقراط قال باللي الدورة الرابعة غادي تشهد مشاركة 38 فرقة ديال التبوريدة، من خريبكة، بني ملال، الفقيه بن صالح، سطات، وحتى من الصحراء المغربية، وزادها فرق نسائية، وهدشي كامل بشروط دقيقة باش تكون الفرجة راقية ومْزيانة.
وما نساوش الدور ديال السلطات، لي عطات الكتاف، وعلى راسها عمالة خريبكة، والمجمع الشريف للفوسفاط، وجهة بني ملال خنيفرة، ووزارات بصاح دايرة خدمتها.
المهرجان غادي يكون كبير، والنية باينة.. بغاوه يبقى منارة للفن والثقافة والتنمية.
ومن جهة أخرى، بونافع هضر على المعرض الوطني للصردي، وقال باللي الصردي ماشي غير خروف، راه جزء من التراث المادي واللامادي، وعندو دور مهم فالتنمية القروية والاقتصادية والثقافية فالمنطقة.
فآخر اللقاء، سقراط دعا الوزير باش يجي يحضر بيدّيه الدورة الرابعة، وشكر جميع الشركاء لي آمنو بفكرة المهرجان، وبغاوه يبقا مشروع إشعاعي وتنموي، ويعطي لوادي زم المكانة لي تستاهل.
وادي زم ما بقاتش غير مدينة فوسط البلاد، ولات كتغلي بالثقافة والفن والتبوريدة. والمهرجان ديالها ماشي غير نشاط، راه مشروع تنموي كامل، وساكنتها باغيين يشوفو بلادهم عامرة بالحياة، والوزير بنسعيد – كيف باين – سمع مزيان، وخلّى الباب محلول.
إذا مشات الأمور مزيان، راه وادي زم غادي تولي حديث الناس فالصيف، ماشي غير فالفايسبوك، حتى فالميدان.
