بقلم غزة مجيد
زكاوه بالولاية الاولى… قالو راه مناضل كبير
وهو فالخفا كايحسب غير شحال يدي وشحال يدير
زكاوه حيت كيعرف ينصب وينهب
ويضحك فالوجه… ويبيع ويهرب
زكاوه حيت عندو شعيبة والشعبية
يبيع الوهم للناس ويساندوه الطعارجية
زكاوه حيت فراقشي كيعرف يتشلهب
ويلبس الباطل ويحلف ويكذب
عطاوه لقب السي المناضل لهبيل
وهو فالحقيقة غير نشال دليل
اليوم فوق العمارية اهو فرحان
وغدا قدام المحكمة كلشي يبان
قالو التزكية غادية تحميه
وهو ما عارفش باللي السجن تايتسنا فيه
لا ولاية احديدان غا تدوم
تفكر اللي لقبلك تبقا مصدوم
عقلتي على في الغابة احوم
راه فالسجن يخمم الزغبي مردوم
تفكر شحال وكل من مجحوم
راه فالحبس ما نفعو بكاء ولا لوم
فين اللي خيرو ناس فيه تتعوم
راه مع خوتو في الركنة مهموم
نهب وخلا المدينة تبكي بالهم
مقصر ضحاك ويقول ما يقدر عليا حاكم
الرجولة فين… وفين اللي كانو يحكمو البارح واليوم
واش اللي ظلمو غاينساهم المظلوم؟
