آش واقع فخريبكة؟ لا والو… غير وكر للدعارة تفضح فلبريك بعد تدخل أمني محكم بتنسيق مع النيابة العامة.

بقلم: غزة مجيد

زوال نهار 7 أبريل، عناصر الدائرة الثانية للأمن الوطني تحركات فصمت، خدمة مبنية على معلومات وتحريات مسبقة، ماشي ضربة ديال الزهر. الهدف كان محدد، والمكان معروف… شقة كيتردد عليها الشك، وكتدور فيها خدمة ماشي قانونية.

وقبل التدخل، كان ربط الاتصال والتنسيق مع النيابة العامة المختصة، باش تكون العملية مؤطرة قانونياً من الأول حتى للآخر، وكل خطوة محسوبة. حيث بحال هاد التدخلات ما كتكونش عشوائية، وضروري فيها التنسيق القانوني باش بنادم يفهم أن العملية ماشي غير مداهمة وخلاص، ولكن إجراء مضبوط كيمشي بالقانون.

وهاد العملية كانت بقيادة العميد الإقليمي هشام أمقور، اللي باين فيها أن الخدمة كانت نقية ومضبوطة، ولكن فإطار احترام السلم الإداري، كانت تحت إشراف رئيس المنطقة الأمنية خالد الساهيلي. هاد الشي كيبيّن أن الميدان فيه تنظيم، وما كاين لا عشوائية لا ارتجال… غير تنسيق واضح بين المسؤولين.

ما طولوش بزاف… المداهمة كانت مباشرة، والنتيجة واضحة: ثلاثة أشخاص تشدو داخل الشقة، فحالة ما كتخليش حتى مجال للتأويل. لا “تجمع عادي، لا زيارة بريئة… غير وكر للدعارة، بالواضح.

اللي بان فهاذ التدخل هو أن البوليس خدام بعقلانية، كيتحرك فالصمت وكيوصل للهدف بلا استعراض. ما كان لا صخب لا ضجيج… غير تدخل مركز، ونتيجة فبلاصتها.

الموقوفين دابا تحت تدابير البحث داخل مقر الشرطة، والتحقيق مفتوح تحت إشراف النيابة العامة المختصة، باش يتفك الخيط كامل:
شكون كيسير؟ شكون كيسهل؟ واش غير حالة معزولة ولا كاين امتداد؟

ولكن اللي خاص يتقال وبوضوح:
هاد العملية ماشي يتيمة.
راه وحدة من بزاف العمليات اللي كيتدارو بشكل مستمر، وناس خدامين فالميدان، ولكن فالصمت، فسرية، دق وسكات… كيتخدم فيها بلا ضو، وبلا ضجيج.

بمعنى آخر، اللي بان اليوم غير واحد الجزء من الخدمة اللي كيديرها الأمن، أما الباقي كيدوز بعيد على الكاميرات، ولكن حاضر وقايم.

ماشي كل مرة خاصنا نسولو آش واقع…
حيت مرات الجواب كيكون بسيط وقاصح:
كان وكر للدعارة… وطاح… والباقي كيتخدم عليه فالصمت، بتنسيق، وبناس خدامين بلا ما يهضرو.