بقلم غزة مجيد
فهاد الوقت اللي ولات فيه الحفلات الداجنة كتدوي اكثر من صوت العقل، والميكروفونات طاغية على القيم، خاصنا نهضرو بصراحة وبلا لف ولا دوران: واش بغينا نربيو جيل ولا غير ندوزوه فالطرب الخاوي؟
خريبكة ماشي مدينة ديال الصدفة… خريبكة ولادة، وديما كتخرج رجال بصح. ومن بين هاد الرجال، كاين واحد ما كيضربش الطبل، ولكن كيهز القرآن… مراد خليل. ماشي دكتور باش يزين الاسم ديالو، ولكن اسد واقف فميدان التربية، خدام بصمت، وكيخرج رجال ماشي جمهور.
كاين اللي كيسهر الليل يصفق ويهز اليدين، وكاين اللي كيسهر الليل يحفظ القرآن ويزرع القيم. الاول كيصنع فرجة كتدوز، والثاني كيبني جيل كيبقى. وهنا الفرق… وهنا النيشان.
هاد الراجل ما جاش بالصدفة، وصل للصف الاول فالجهة والاقليم، وخذا المرتبة الثانية وطنيا فجائزة محمد السادس للكتاتيب القرآنية… ماشي بالحظ، ولكن بالعرق والصبر وخدمة بصح. هادي ماشي غير جائزة، هادي صفعة لكل واحد مفكر التنمية هي غير منصة وضوء وكاميرا.
اللي دايرين الحفلات الداجنة وكيبيعو الوهم للناس، خاصهم يعرفو: البلاد ما كتتبناش بالتصفيق، ولكن كتتبنا بالقرآن، بالتربية، وبناس عندهم ضمير. التاريخ ما عمره كتب على اللي دارو السهرة، ولكن كينقش سميات اللي رباو اجيال.
مراد خليل… هادا ماشي اسم عابر، هادا نيشان فوجه التفاهة. اسد وسط الضجيج، ختار يكون فصف الرجال اللي كيبنيو، ماشي اللي كيدوزو الوقت.
وخريبكة… ما زال فيها النفس، وما زال فيها الرجال… غير خاصنا نعرفو شكون نشجعو: اللي كيغني علينا، ولا اللي كيربي فينا.
.
