بقلم:غزة مجيد
اش واقع؟ لا والو غير قاعات كتتحول لملاهي، التيكي كيتباع، والناس كتتزاحم… وكلشي داير راسو ما شاف والو.
واش هادشي اللي واقع دابا فبعض القاعات كيتسمى “نشاط مرخص” ولا “سيبة مقنعة”؟ الناس كيديرو حفلات، المغاني كيتجابو، التذاكر كيتباعو، والتصاور كتدور فالفايس… وكأننا فمهرجان، ماشي فقاعة ديال مناسبات!
ولكن السؤال اللي خاصو يتطرح بصوت عالي: مرخص؟ زعما اش من ترخيص؟ وشنو فيه؟
حيت الترخيص ماشي “ورقة وخلاص”، راه فيه شروط… فيه قانون… فيه مسؤولية. واش هاد القاعات عندها الحق تولي قاعات حفلات تجارية؟ ولا غير الاعراس والمناسبات العائلية؟
واش دفتر التحملات كيسمح تجيب مغني وتبيع التيكي؟ ولا حنا كنبدلو القانون على حسب المزاج؟
زيد عليها… الاكتظاظ. القاعة عامرة على اخرها، النفس مقطوع، الناس لازقة فبعضياتها… وكلشي كايضحك حتى توقع شي مصيبة.
ايوا الى طاحت شي كارثة، شكون غادي يتحمل؟ صاحب القاعة؟ ولا اللي عطاه الضوء الاخضر؟ ولا اللي شاف وسكت؟
راه ماشي اول مرة كنسمعو على كوارث بسبب الزحام، واللي مات… مات، ومن بعد كتبدا الحكاية: “فتح تحقيق”… “تحديد المسؤوليات”… وكل واحد كيغسل يديه!
علاش ديما كنستناو حتى توقع الفاجعة باش نفيقو؟ علاش الوقاية ماشي حاضرة؟ فين مخارج النجاة؟ فين شروط السلامة؟ فين المراقبة الحقيقية ولا غير دوزنا والسلام؟
هاد الشي ماشي لعب. هاد الشي فيه ارواح الناس.
رسالة واضحة للسلطة المحلية، خصوصا رىيس داىرة خريبكة: اما هادشي قانوني وخرجوا وضحوا للناس كيفاش، واما راه كاين خلل كبير وخاصو يتوقف دابا قبل غدا.
حيت الى وقع شي نهار اللي ما يتمنا حتى واحد… ما غاديش تنفع لا البلاغات لا التبريرات.
