بقلم غزة مجيد.
عجبك الحال؟ يا رئيس الحكومة
ياك ما تصحاب الشعب ساكت، ولا دمدومة؟
اشطيح، اورديح، واش فخبارك هاجرو ولاد الحومة
فضلوا الموت ولا يعيشوا معاكم انتوما
شي ياكل الكافيار والحوت اوكرشو مكهومة
اوشي ياكلو الحوت مخلا فيه غير لعظومة
شي فعز شبابو غادي الموت نفسيتو مهزومة
انتوما كيما انتوما هاماكم غير الكرمومة
الشباب طاب، والدنيا ولات في عينيه مظلومة
عذبتو أولاد البلاد، بسببكم ولات ملغومة
بسببكم انتوما، الخبزة ولات مسمومة
مشاو للفنيدق، ولمن بغيتو توجهو هاد اللومة؟
هجرة جماعية، قالو تحريض ديالكم نتوما
هذا واقع، حقيقة مجروحة، فيق من هاد النوما
أعطيتو فرصة للعدو باش يتشفى، واش ماشي حشوما؟
كلشي هرب، شد شد، باش يخرج ناطق الحكومة؟
فين تأطيرك للشباب؟ علاش معولة لبلاد؟
جات الفرصة، واش البرقية مفهومة؟
شي وصل، وشي غرق، شباب قاصرين، الميمة مظلومة
لا صحة، لا تعليم، الزيادات والخدمة معدومة
بغاو العيشة الزينة، ولكن البلاد ولات مهضومة
غرقو في الغربة، واللي بقا، ولات حالتو مغمومة
فين الأحلام؟ فين الطموح؟ كبرنا على وعود وهمية وملغومة
واللي كان عندو أمل، لقا الحياة كلها مظلومة
بكاو الصغار والكبار، والآمال في البحر قضية محسومة
حكومتك كثر فيها القهر، والقوانين غير مرسومة
والله ارحم الغيوان لي قالو زمان مهمومة هاد الدنيا مهمومة
