بقلم:غزة مجيد
الدرويش بالغلاء ولى ظهرو مشقوق
شحال قدنا نصبرو، وبالصبر القلب ولى محروق
ليد نبلات والسلسول عواج و لقدم ولى مشقوق
لا تعليم مقاد، ولا مستقبل لولاد والقنديل قلال ضوو و نفق الامل ولى مغلوق
العزري كافح و قرا و تهضمات ليه الحقوق
اسي المسؤول بغيتي الحقيقة ضرب دويرة في السوق
خلطتو الطبقات و ولادكم خليتوهم الفوق
الدرويش باغي يعيش و بسباب الهم زاد مرضو ولى يتوقف و مخنوق
لا معادلة تحلات العزري مسكين جرب في الدنيا كل الطروق
غوت غوتة حنينة فيها الشوق، عتقي ولدك ياما الدم كحال في لعروق
كلشي غرق بالديون والدنيا كحالت في عينينا لا عاتق ولا معتوق
الميمة ودعات وليداتها بين الامواج و قلبها محروق
الدرويش تكمم ولا قدر يتكلم غرق بالدراري و بالديون ولى مخنوق
لفلوس جمعوهم و صدروهم واش خلاو لينا في الصندوق
المخطط أ فشل او الغلة والربيع كلشي ولى محروق؟
الشباب عيا و هاجر باش يرجعو لي كان مسروق
موس الهم دخل في اللحم وقاس العظم و قطع لدرويش لعروق
حمادي مصايب مياكل و مول الكالة منغم بالاندلسي والطرب والجوق
كثرة المشاكيل والهم الحياة تحولات من رضات الوالدين للعقوق
يا خسارة ضربو الكميلة و لحسو الطبسيل و مخلاو لدرويش مايذوق
