بقلم:غزة مجيد
تحية للإعلام الحر
هذا إعلام النسخ واللصق
هدا إعلام طاح اعليه البق
إمتى السياسي ولا يعطي صداقة ويشفق
لي معندو خدمة اجيب ميكرو ويمرّق
أو كلشي باغي اوصل السيدو و يتملق
رمضان دخل دير الصنية دخل لجيب راك.محفق
هدا علام النخاسة الطالح والفالح صعيب تفرق
الخبر ولا باحال الجيفة الملهوف ينهش ويمزق
ها لي ولا اصفق هالي ولا اعلق اكاين لي ولامحقيق في اللعاقة احقق
هالي دار المهنة قوادة بيها ابوس ويعنق
اوهالي دارت المهنة سبة باش تسافر او التزندق
اوهالي دار لطرقان بطاقة من المخالفة يزهق
وشحال من واحد حساب راسو اجتماعي اهو يتلمق ويتلصق
الضمائر الحية تردمات والبيضق ولا ايشنق
الميوعة في الاخبار بحال الروث ملي تستنشق
اوليدي فيق تعطلتي على الخدمة نوض ترزق
خويا عفاك بيع ليا بطاقة بغيت نحلق
ألاواه سيدي لاواه لخماسية والبارود والخردق
هذا إعلام اسميتو ميزي..ذوّق باش نزوق
ولا إعلام الخندق بحال البهايم في الفندق
شي دريهمات عفاك أنا مقطوع اعطيني نكمي أو ليك النعوق
شحال تدفع السي رايس نجمع ليك الجوقة ونجوق
غير ميزي وخا انت خاطئ أو راسب انديروك متفوق
اكتب بالليل بلا ما دقق وامسح بنهار بلا متسوق آش تكذب آش تصدق
قلام التاريخ راه يسجل ويوثق