بقلم:غزة مجيد
سافر في منزلة سعد السعود ملي تزنزن النحلة في العود
لي باغي الزهو والزرود عليك بمول البندير والبكرة مولات النهود، .
اختار بنت الأصل ماشي دواحة قالوها الجدود
لا تعيش من الطلبة وتقول من دار القايد الحبة والبارود
فين أيامك أمي عايشة!!! فين أيامك يابو جلود
المشداق ماتسنا منو سخاوة ولد الخير من القليل يجود
عيش راجل بذراعك، قاد مقدود لا تعيش مذلول ممدود
كون سيدي ونقول لك مولاي، نركع ليك ونزيدك التحية والسجود
الى مشيتي ضايف احدر عينيك وكول لي قسم الله ماتتشرط, وكول من المجود
دير سكنة زوينة وتبرع وسقفها بالقرمود
كول رزقك ياالضحيكة تموت ويتبرع بيهم العكرود
ماتعاشر ثلاتة الجحود والحقود والحسود
رافق المعطاي السرمود ولي ما يخون العهود، ولي أصلو من البو والجدود
المشكاك مادخلو لدارك والرقاص مايعرف سرارك… الدبانة ماتدخل الفم المسدود
لكروش الجيعانة ماتعرف نضال ماتعرف تضحية تبيعك لعدوك بالنقود
لي كابر وسط العيالات لا تعول عليه الحساب المثني راه يرجعو فرود
عيش وسط الرجال مرجل ماتعيش لاصق بحال العنقود
طاحت الصمعة علقتو الحجام ياك لبلان دارو مرعود
لا تنقز في المجمع بحال القرود
لا تخزن بحال القنفود وعيش عيشت الأسود
كل قاضي يحكم بحكامو وخلي كلامك موزون مرصود
لاتسمح في حق ولادك، خوديه بالقانون ولا بالعمود
لا تركب على لحمير الزعراطة… سنح لدهم واقصد المقصود