آش نقوليك، راه النهب ما جا صدفة،
كان خطة مدروسة، توقيع وختم بصمتو.
نهب ومشى، وخلا لعروسة رهينة بفعلتو،
مثقلة اعطاب ، والنتيجة قدّامك فضحاتو.
دار عصابة من طلّابة ونصّابة، هادي قصتو،
تنظيم محكم، توزيع أدوار، وخطط لجريمتو.
رئيس فاسد، والفساد ما جا بوحد فكرتو ،
رضع من تدي التأجيل، هادا جهدو فقرايتو.
قالو التنمية! والزفت كان شهاد زور،
تخدير مؤقت باش يتغطى النهب، الأمطار فضحتو.
تزفّتات الطرقان، قالك آ سيدي بهاتت الصباغتو،
وتخلا على الأساس، قالك هما اللي صوّتو.
بتز المقاويل ، تضارب المصالح بان وفضح نيتو.
قالو إصلاح، وهو غير حملة مقنّعة،صوت انتخابي، هادي سياستو.
حديدان نهب البارح، وبفلوس الشمايت
شرى فيرمة الليمون وحصّن بلاصتو،
واليوم باسمو باقي النهب خدام، حافظ دمتو.
واللصوص نفسهم، غير بدّلو الواجهة،
والمنهج كلا معروف بشطحتو.
تفضح بالرداءة، تكشفات فضيحتهم وفضيحتو،
كيف المشكاك فمراتو يعيش براحتو؟
كلا سرق ونهب بلا حساب،
وخلا الكلاب يحميو عقيدتو ،
والثعلب داخ و وصاهم على كسيبتو
فين عمر الذيب يحرس النعاج؟ هادي شخصيتو.
والدليل خلا التدشين عليه شاهد،
مركز الحماق، هادي هي حقيقتو.
والفطين قصد الشرفة، ومن القرآن خدا براكتو،
قواد تواركة كيتربص ويتقرب باش يحقق أمنيّتو،
كيبيع الولاء مع الريح، أقنعة موسمية
على حساب مصلحتو.
لمجمار خدامين الجداول والسحور،
وكلا ودبيحتو.
ماماس فكعان، أمنيّتو يحمي وزيعتو،
يشد الخيوط ويشعل الفتنة، هادي هي تجربتو.
بلاد السلالية، غادي تلقى العجب،
مكتوب بدم المظلوم: تهديد واستحواذ ورايس نزع ليه بلاصتو .
سول على رايس المعزول علاش طلعات كتبتو
سول على البغلماني شحال عمر ليه في شكارتو
سول على ولد كم علاش حيدو من بلاصتو
دقة في الباب بانُو الجواد، طلع لخواض المبادرة طلعات سميتو،
وشحال من الخواض باقي في الواد مصفات مايتو
واليوم جاو يتقربو، يديرو فيها نصح وأمانة،
وفي الود فخ، وفي السلام خديعتو.
إلى تحيد الراس وتخلي الذنب،
الوحش يرجع أشرس،
حيت الجذور باقية ومحصّناتو.
لعروسة مرجيا فيك الرجا ،اوساعيا رحمتو
ميزان عدل ما يخافش وما تخفش هيبتو
ميزان يقطع مع الخفاش والتكماش وما يخليش الفساد اللي ساد يلعب لعيبتو
أصلك علم، ومن بيت قرآن،
والتربية فصفايتو،
هنا التاريخ يكتب إدانته أو نجاتو.
هاد نداء ماشي شهادة زور،
شهادة مدينة ، رافضة تكون فالصمت
شريكة فجريمتو.
